Mat 12 | NdeIBE | STEP | Ngalesosikhathi uJesu wadabula phakathi kwamasimu amabele kulilanga leSabatha. Abafundi bakhe basebelambile basebeqhulula izikhwebu zamabele badla.

Matthew 12

INkosi YeSabatha

1 Ngalesosikhathi uJesu wadabula phakathi kwamasimu amabele kulilanga leSabatha. Abafundi bakhe basebelambile basebeqhulula izikhwebu zamabele badla.

2 AbaFarisi bakubona lokhu bathi kuye, “Khangela! Abafundi bakho benza okuphambene lomthetho ngeSabatha.”

3 Waphendula wathi, “Kalifundanga yini okwenziwa nguDavida lapho yena labakhula bakhe basebelambile? 4 Wangena endlini kaNkulunkulu, yena labakhula bakhe basidla isinkwa esingcwelisiweyo – into eyayingavunyelwa ngomthetho ukuba bayenze, kodwa ingenziwa ngabaphristi kuphela.

5 Kumbe kalifundanga yini eMthethweni ukuthi ngeSabatha abaphristi ethempelini bayalungcolisa lolusuku kodwa kabalacala.

6 Ngiyalitshela ukuthi lowo omkhulu kulethempeli ukhona lapha. 7 Aluba lalikwazile ukuthi amazwi la atshoni, athi, ‘Ngifuna isihawu, hatshi umhlatshelo’ ngabe alibalahlanga abangelacala. 8 Phela iNdodana yoMuntu iyiNkosi yeSabatha.”

9 Esuka lapho wayangena esinagogeni labo,

10 khonapho kulendoda eyayitshwabhene isandla. Kwathi ngoba bedinga indlela yokubeka uJesu icala bambuza bathi, “Kuyavunyelwa yini emthethweni ukusilisa ngeSabatha na?”

11 Wathi kubo, “Nxa omunye wenu elemvu esuka iwele egodini ngeSabatha, kazukuyibamba ayikhuphe na? 12 Pho umuntu uligugu elinganani kulemvu! Yikho-ke kusemthethweni ukwenza okuhle ngeSabatha.”

13 Wasesithi kuleyondoda, “Yelula isandla sakho.” Ngakho yaselula sesisilile ngokupheleleyo, sesiqinile njengesinye. 14 Kodwa abaFarisi basuka lapho bayakwakha icebo lokuthi bangambulala njani uJesu.

Inceku KaNkulunkulu Ekhethiweyo

15 UJesu esekunanzelele lokho wasuka kuleyondawo. Abanengi bamlandela, wasilisa bonke abagulayo babo, 16 ebalaya ukuthi bangakhulumi ukuthi ungubani. 17 Lokhu kwakuyikugcwalisa lokho okwakukhulunywe ngumphrofethi u-Isaya ukuthi:

18 “Nansi inceku yami engiyikhethileyo, yona engiyithandayo, engithokoza ngayo; Ngizabeka uMoya wami phezu kwayo, izamemezela ukulunga phakathi kwezizwe.

19 Kayiyikuphika inkani loba imemeze; kakho ozalizwa ilizwi layo emigwaqweni.

20 Umhlanga ofecekileyo kayiyikuwephula lentambo yesibane ethunqayo kayiyikuyicima, ize ilethe ukunqoba kokulunga.

21 Izizwe zizabeka ithemba lazo ebizweni layo.”

UJesu LoBhelizebhubhi

22 Basebeletha kuye indoda eyayiledimoni, eyayiyisiphofu njalo iyisimungulu. UJesu wayisilisa yakwazi ukukhuluma lokubona.

23 Bonke abantu bamangala bathi, “Kambe lo angabe uyiNdodana kaDavida na?”

24 Kodwa kwathi abaFarisi bekuzwa lokhu bathi, “Kungamandla kaBhelizebhubhi umuntu lo axotsha ngawo amadimoni.”

25 UJesu wayeyazi imicabango yabo wasesithi kubo, “Yilowo lalowo umbuso owehlukene phakathi kawumi. 26 Nxa uSathane exotsha uSathane udabukene phakathi. Pho umbuso wakhe ungema kanjani? 27 Uma mina ngikhupha amadimoni ngoBhelizebhubhi, pho abantu benu bawakhupha ngani? Kungakho yibo abalehlulelayo. 28 Kodwa uma ngikhupha amadimoni ngoMoya kaNkulunkulu, kutsho ukuthi umbuso kaNkulunkulu usufikile kini.

29 “Loba njalo, umuntu angangena kanjani endlini yesiqhwaga aphange izimpahla zaso ngaphandle kokuba aqale asibophe isiqhwaga leso? Lapho-ke usengayiphanga indlu yaso.

30 “Lowo ongemanga lami umelana lami, lalowo ongabuthi lami uyachithiza. 31 Yikho ngiyalitshela ngithi siphi lasiphi isono lesithuko sizathethelelwa, kodwa ukuthuka uMoya akuyi kuthethelelwa.

32 “Lowo okhuluma okubi ngeNdodana uzathethelelwa, kodwa lowo okhuluma okubi ngoMoya oNgcwele akazukuthethelelwa kuleli iphakade lasephakadeni elizayo.

33 “Ungenza isihlahla sibe sihle lezithelo zaso zizabanhle, loba ungenza isihlahla sibe sibi lezithelo zaso zizabambi, ngoba isihlahla saziwa ngezithelo zaso. 34 Lina hazane lwezinyoka, lingakukhuluma kanjani okuhle lina libabi na? Ngoba lokho okuphihlika enhliziyweni yikho umlomo okukhulumayo.

35 Umuntu olungileyo uletha izinto ezinhle ziphuma ebuhleni abulombe ngaphakathi kwakhe, njalo lomuntu omubi ukhihliza izinto ezimbi azigcine ngaphakathi kwakhe.

36 Kodwa ngiyalitshela ukuthi abantu bazamele baziphendulele ngosuku lokwahlulelwa ngawo wonke amazwi obutshapha abawakhulumayo.

37 Ngokuba lizakhululwa mayelana lamazwi enu njalo lizalahlwa ngokumayelana lamazwi enu.”

Isiboniso SikaJona

38 Kwasekusithi abanye babaFarisi labafundisi bomthetho bathi kuye, “Mfundisi, sifuna ukubona isiboniso sommangaliso esenziwa nguwe.”

39 Waphendula wathi, “Isizukulwane esixhwalileyo lesiphangayo sicela isiboniso sommangaliso! Kodwa kasikho esizaboniswa ngaphandle kwesiboniso sikamphrofethi uJona.

40 NjengoJona owahlala izinsuku ezintathu lobusuku obuthathu esiswini senhlanzi enkulu, kanjalo iNdodana yoMuntu izahlala izinsuku ezintathu lobusuku obuthathu emathunjini omhlabathi. 41 Abantu baseNineve bazakuma kanye lalesi isizukulwane ngosuku lokwahlulelwa basilahle; ngokuba baphenduka betshunyayezwa nguJona, ikanti manje nje omkhulu kuloJona ukhonapha.

42 INdlovukazi yaseNingizimu izavuka ekwahlulelweni kanye lalesi isizukulwane isilahle; ngokuba yeza ivela emaphethelweni omhlaba izokuzwa uSolomoni; pho manje omkhulu kuloSolomoni usekhona.

43 “Nxa umoya omubi uphuma emuntwini uhamba uzula enkangala udinga ukuphumula kodwa ungakufumani. 44 Ubususithi, ‘Ngizabuyela endlini engaphuma kuyo.’ Uthi ufika ufice indlu ingelamuntu, ithanyeliwe yahlanzeka, konke kumi kuhle. 45 Ubusuhamba uyothatha eminye imimoya eyisikhombisa exhwale okudlula wona, ingene ihlale khona. Isicino salowomuntu sibi okudlula ekuqaleni. Kuzakuba njalo kulesi sizukulwane esixhwalileyo.”

Unina KaJesu Labafowabo

46 UJesu elokhu esakhuluma lamaxuku abantu, unina labafowabo babemi phandle befuna ukukhuluma laye.

47 Omunye wamtshela wathi, “Unyoko labafowenu bemi phandle, bafuna ukukhuluma lawe.”

48 Wamphendula wathi, “Ngubani ongumama njalo ngobani abangabafowethu na?”

49 Wakhomba abafundi bakhe wathi, “Nampa abangumama labangabafowethu. 50 Ngoba ingqe ngubani owenza intando kaBaba osezulwini ungumfowethu, ungudadewethu njalo ungumama.”